Асслому алайкум! Суд ҳукм чиқарди. Саёқ юрган таёқ ер…

Халқимизда «Ҳалолидан берсин» деган ҳикматли дуо бор. Зеро, ҳалоллик-тинчлик, хотиржамлик, фаровонлик гарови.

Аксинча, ҳаром ҳаёт тарзини танлаш инсонни тўғри йўлдан адаштиради,боши берк кўчага олиб киради.

Фарғона шаҳрида яшовчи фуқаро Ж. ҳам қинғир йўллар билан пул топишга ўрганди. Йигирма олти ёшда, оилали, тўрт нафар фарзанди борлигига қарамасдан ичкиликка муккасидан кетди, бирор жойда ёлчитиб ишламади. Бекорчилик натижасида гиёҳвандлик оғуси олди- сотди ишларига аралашиб қолди.

Судланувчи Ж. қувасойлик шахси аниқланмаган » Равшан» билан келишилган ҳолда бир неча бор «гашиш» гиёҳвандлик воситаси олди-сотдиси билан шуғулланиб келишган.

Фуқаро Ж. 2024 йил 10 август куни катта миқдордаги гиёҳвандлик моддаси билан қонун ҳимоячилари томонидан қўлга олинди. Шу куни Қувасой шаҳридаги «Арка»дан Фарғона шаҳрига киришда ИИБ ЙПХ ходимлари рейд ўтказишаётганда судланувчи Ж. бошқарувидаги енгил машина салони текширилади, олди ўриндиқдаги қора рангли спорт сумкасида 5 кг. » гашиш» гиёҳвандлик воситаси борлиги аниқланади ва улар ашёвий далил сифатида олиниб, суд-кимёвий экспертизасига тақдим қилинади. Мутахассислар далилий ашёни «гашиш» гиёҳвандлик моддаси эканлигини тасдиқладилар.

Натижада қанчадан-қанча бегуноҳ фуқароларнинг гиёҳвандлик заҳриқотилидан заҳарланиши олди олинди.

Жиноят ишлари бўйича Фарғона шаҳар судида судланувчи Ж. ўз айбига тўлиқ иқрор бўлди ва қилмишидан қаттиқ пушаймонлигини айтди.

Ҳар қандай жиноятга жазо муқаррар. Мазкур очиқ суд судланувчи Ж.ни Ўзбекистон Республикаси ЖК 28,246-моддасининг 2-қисми ва 25,273-моддасининг 5-қисмида назарда тутилган жиноятларни содир этганликда айбланди, унга10 йил 6 ой озодликдан маҳрум қилиш жазосини тайинлади.

Қиссадан ҳисса шуки, ҳар бир фуқаро ўз ҳаққи- ҳуқуқини билиши, шу аснода инсоний ва қонуний бурчини ҳам унутмаслиги мақсадга мувофиқдир.

Шоҳижахон Тоҳиров, жиноят ишлари бўйича Фарғона шаҳар суди судъяси ёрдамчиси.