Коррупцияга қарши курашиш Ўзбекистонда давлат сиёсатининг энг устувор йўналишларидан бирига айланиб улгурди. Коррупцияга қарши курашиш доирасида бир қатор дастурлар қабул қилинди. Бугунги кунда, бу иллатга қарши кенг қамровли ишлар амалга оширилиб келмоқда.
Коррупцияга қарши курашишда, биринчи навбатда, аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш лозимдир.
Ўзбекистон Республикаси Президентининг 09.01.2019 йил кунги ПФ-5618-сонли “Жамиятда ҳуқуқий онг ва ҳуқуқий маданиятни юксалтириш тизимини тубдан такомиллаштириш тўғрисида”ги Фармонида, жамиятда ҳуқуқий онг ва ҳуқуқий маданиятни юксалтиришда, энг аввало, таълим-тарбиянинг тизимли ва узвий равишда олиб борилишига алоҳида эътибор қаратиш, мактабгача таълим тизимидан бошлаб, аҳолининг барча қатламларига ҳуқуқий онг ва ҳуқуқий маданиятни чуқур сингдириш, шахсий манфаатлар ҳамда жамият манфаатлари ўртасидаги мувозанатни сақлаш ғояларини кенг тарғиб қилиш, ёш авлод онгига ҳуқуқ ва бурч, ҳалоллик ва поклик тушунчаларини ҳамда одоб-ахлоқ нормаларини чуқур сингдириб бориш, Конституциянинг (https://old.lex.uz/docs/35869) муҳим жиҳатларини уларга болалигидан бошлаб ўргатиш, давлат хизматчиларининг ҳуқуқий онги ва ҳуқуқий маданиятини юксалтириб бориш, уларда коррупция ва бошқа ҳуқуқбузарликларга нисбатан муросасизлик муносабатини шакллантириш — ҳуқуқий онг ва ҳуқуқий маданиятни юксалтиришнинг асосий вазифаларидан бири этиб белгиланган.
Коррупцияни олдини олиш ва коррупцияга қарши курашиш борасида, Ўзбекистон Республикасининг Судьялар олий кенгаши ва Ўзбекистон Республикасининг Олий суди томонидан ҳам кенг қамровли ишлар олиб борилмоқда. Жумладан, Ўзбекистон Республикасининг Судьялар олий кенгашида илк бор судьялик лавозимига тайинланган судьяларга судьялик вазифасига киришишдан олдин ва жойларда коррупцияни олдини олиш мақсадида, коррупцион ҳолатлар бўйича реал воқеаларга асосланган фильмлар мунтазам равишда намойиш этиб келинмоқда.
“Коррупцияга қарши курашиш тўғрисида”ги Конуннинг 21-моддасида, давлат органларининг ходимлари мансаб ёки хизмат мажбуриятларини бажариш чоғида манфаатлар тўқнашувига олиб келадиган ёки олиб келиши мумкин бўлган шахсий манфаатдорликка йўл қўймаслиги, манфаатлар тўқнашуви юзага келган тақдирда, давлат органларининг ходимлари ўзининг бевосита раҳбарини дарҳол хабардор қилиши, манфаатлар тўқнашуви мавжудлиги тўғрисида маълумотлар олган раҳбар бу тўқнашувнинг олдини олиш ёки уни бартараф этиш юзасидан ўз вақтида чоралар кўриши шартлиги белгиланган.
Жиноят ишлари бўйича Фарғона шаҳар судининг судья ёрдамчиси Дадабоев Файзуллоҳ Рустам ўғли